Millum annað kunnu vit finna metallið arsen í LED lampum, ið eru í lutunum, og klorparafin og ftalat í plasti og gummi, t.d. í leidningum og káplum. Eisini kunnu ávísir bromeraðir flammutálmarar vera í plastinum. Serliga dálkandi evnið bisfenol A kann vera í fleiri tilfarsliðum í hesum vørunum, m.a. í PVC, epoxylími og hørðum plasti.
Við vanligari nýtslu geva vørurnar ikki nevndu evni frá sær. Hinvegin kunnu evnini enda í umhvørvinum undir framleiðslu, ella um vørurnar ikki verða rætt burturbeindar.
At amboð og prýðislutir viðhvørt kunnu hava nikkul í sær, munnu fólk flest vita. Færri munnu helst geva sær far um, at nikkul eisini finst í fartelefonum. Í nøkrum fartelefonum eru knøttarnir ella aðrir tilfarsliðir úr nikli. Í fleiri londum er nú bann fyri at selja telefonir við nikli, men gamlar fartelefonir kunnu innihalda nikkul.
Í Danmark og aðrastaðni hava fleiri tilburðir av ovurviðkvæmi verið staðfestir, sum standast av nikkul í fartelefonum. Hóast tú ikki ert nikkulovurviðkvæmur sum er, eigur tú at bera teg undan sambandi við nikkul, fyri at sleppa undan nikkulovurviðkvæmi seinni. Les her, hvussu tú finnur út av, um nikkul er í eini vøru.
Fartelefonir, MP3-spælarar, iPod’ar og líknandi vørur skulu burturbeinast sum elektroniskt burturkast. Í ávísum førum ber eisini til at lata hesar vørur inn aftur, har tær vórðu keyptar. Tú kanst spyrja teg fyri. Les meira um burturbeining av burturkasti her.
 |
Vit tú vita meira? Um tú hevur spurningar um kemisk evni í vørum, so ring til Umhvørvisstovuna, tlf. 342400 ella skriva til okkara á us@us.fo |